(Vestnes Varfjell - Elnesvågen 2-2) Vestnes Varfjell kjempa seg til uavgjort og eitt poeng heime mot topplaget Elnesvågen fredag kveld. Likevel var det ein skuffa gjeng etter kampslutt. Utlkninga til gjestane kom nemleg på overtid. Tommy Kanishi og Elling Olafsen hadde før det sendt heimelaget i føringa mot spelets gang.
Trenar Odd Hjelvik hadde tru på poeng før kampen sjølv om det var eitt av dei beste laga i divisjonen som sto på andre banehalvdel. Laget starta også denne gongen med fem i forsvar, men likevel litt meir offensivt enn mot Træff 2, med to mann på topp.
Det var gjestane frå Hustadvika, med tidlegare Varfjell-kaptein Amund Stavem i ein sentral posisjon, som hadde overtaket frå start. Ørjan Tangen heada unna på strek før to minutt var spelt. Så small ballen i tverrliggaren på ein corner. Varfjell heldt unna i ein halvtime. Då kontra gjestane og Robin Bergseth kunne skåre etter innlegg frammom mål.
Heimelaget hadde skapt nokre nestensjansar, men berre ei god redning av keeper hindre utlikning då Rudi Samseth heada mot mål etter eit frispark frå Leo Krogseth. Elnesvågen hadde ein ball i stolpen og ut før laga gjekk til pause.
Andre omgang starta med mykje av det same. Elnesvågen hadde ballen mest, men heimelaget var no giftigare framover. Ti minutt av omgangen var spelt då eit langt utspark frå målvakt Egil Dalhaug vart heada ned av Jon Venås til Elling Olafsen som fann Tommy Kanishi Andreassen. Kapteinen lurte seg mellom keeper og forsvar og sette inn utlikninga.
Amund Stavem ville gjerne ha ei skåring i Vestnes idrettspark igjen, men kom ikkje nærare enn eit langskot som gjekk via ein spelar og i tverrliggaren etter 65 minutt.
Ti minutt seinare vart det i staden 2-1, igjen etter ein dødball. Ørjan Tangen la framspelet, Elling Olafsen brukte sitt innstinkt som måljeger då han vann duellen med keeper og midtstoppar og heada ballen i mål.
Enno var det mange minutt att å spele, gjestane verka stressa og det meste rann ut i sand. Eit minutt av overtida var spelt då det likevel glapp. Keeper Egil Dalhaug fekk boksa ut, men ballen kom i retur og trilla via stolpen og ein Elnesvågen-spelar i mål. Det vart ropt på offside sidan keeper var langt ute, men tv-bilda viser at det målet nok var korrekt om enn veldig uheldig.
Surt å tape to poeng når laget var så nærme seieren, men etter å ha fått kampen litt på avstand må ein tenke at dette var eit sterkt poeng mot ein god motstandar. Igjen ein kamp med god kollektiv innsats der alle gav alt til siste spark.
Neste kamp er borte mot Averøykameratene.
KAMPFAKTA
Vestnes Varfjell - Elnesvågen 2-2 (0-1)
Vestnes idrettspark, 85 tilskuarar
Mål:
0-1 (30) Robin-Aleksander Bergseth
1-1 (57) Tommy Kanishi Andreassen
2-1 (75) Elling Olafsen
2-2 (90) Brian Øverli
Dommar: Eirik Furu, FCK. Assistentdommarar: Mikael Oppedal, Frei og Mohamed Riad Suliman Aldifari, Sunndal
Gult kort: Jon Areas Venås, Vestnes Varfjell
Vestnes Varfjell (5-3-2): Egil Dalhaug; Sverre Lindseth, Ørjan Tangen, Kristian Flittie Onstad, Svein Erik Lange Male, Rudi Samseth - Simon Kjørvik (Vegar Skare 54. (Lucas Moen 84.)), Tommy Kanishi Andreassen (k), Leo Krogseth - Jon Areas Venås (Fredrik Lie 71.), Elling Olafsen (Jon Areas Venås 84.)
Bildegalleri under
