Knallstart på sesongen for effektive Varfjell

Sunndal - Vestnes Varfjell 0-3) Vestnes Varfjell fekk ein god start på sesongen i 4. divisjon etter ein knallsterk borteseier på Sande stadion laurdag. Noah Johansen på ei kontring og Amund Stavem på eit langskot sørga for 2-0 til pause. Elling Olafsen fastsette til 3-0 på ein lobb over keeper i andre omgang.

- I dag satt taktikken veldig bra, seier ein fornøgd Alexander Connor til varfjell.no etter kampen.

Han fekk sjå eit kampbilde slik han såg det føre seg før kampstart: Ei litt forsiktig opning frå begge lag. Sunndal hadde ballen mest, medan Vestnes Varfjell slo til på overgangar.

Seks minutt var spelt då Ørjan Tangen la ein presis ball i bakrommet til Noah Johansen. Den unge spissen sprang frå Sunndal-forsvaret og sette ballen forbi keeper til 0-1. Også neste sjanse gjekk i mål for bortelaget. Kaptein Amund Stavem fekk gå aleine og prikka inn 0-2 med eit velplassert skot frå over 20 meter etter 15 minutt.

Varfjell-trenaren varsla freidig at Sunndal (og Tomrefjord) var dei to laga som ville rykke ned då han og andre trenarar vart intervjua av Driva (saka ligg også på Rbnett) før seriestart.

Sunndal har mista mange rutinerte spelarar i vinter, medan Vestnes Varfjell har fått god påfyll av kvalitet. Det såg også ut til å skilje laga ein jamnspelt kamp på ei vårleg bane i vårsola i Sunndal. Vinden tok kraftig heile kampen og då Varfjell trudde dei skulle få medvind i andre omgang snudde den. Det såg likevel ikkje ut til å påvirke banespelet der Vestnes Varfjell effektivt tok sine moglegheiter medan heimelaget sleit med å skape sjansar.

0-3 kom midtvegs i andre omgang. Varfjell braut på midtbanen, ballen hamna hos Elling Olafsen. Den gamle storskåraren sette fart og lurte oppassaren med ei frekk finte før han la ballen i fin boge over keeper frå 17 meter.

Først heilt på slutten hadde Sunndal nokre store sjansar der ballen også traff tverrliggaren.

Alt i alt ein solid gjennomført bortekamp av Vestnes Varfjell. FCK heime komande fredag er neste motstandar.

KAMPFAKTA:

Sunndal - Vestnes Varfjell 0-3 (0-2)

Seriekamp 4. divisjon Nordmøre og Romsdal, laurdag 13. april 2024 kl 14

Sande stadion (gras), 100 tilskuarar

Mål:

0-1 (7) Noah Johansen

0-2 (15) Amund Stavem

0-3 (64) Elling Olafsen

Dommar: Ole Magne Nordvik, Søya. Assistentdommarar: Harald Vebenstad, AK og Johannes Dahlberg, Frei

Gult kort: Lucas Pedersen Våge (12) og Vegard Ellingseter (57), Vestnes Varfjell; Bogdan Bogavac (24), Ole Einar Ueland Dragseth (39) og Birger Brevik (82), Sunndal

Vestnes Varfjell (4-4-2): Egil Dalhaug: Cédric Ronnie Hellström Andreassen (Svein Erik Lange Male 85.), Vegard Storsæter Ellingseter, Ørjan Tangen (Arjan Furland Sylte 90.), Lucas Pedersen Våge (Lars-Helge Lien 80.) - Tommy Kanishi Andreassen (Sverre Olgar Lindset 75.), Didrik Selnes Sæter (Andreas Hamnes Lønset 87.), Leo Villa Krogseth, Amund Stavem (k) - Noah Johannes Johansen (Eirik Leao Tomren 70.), Elling Furland Olafsen (Vegar Skare 80.)