(Vestnes Varfjell - Åndalsnes 0-3) Eit nykomponert Vestnes Varfjell-lag fekk det som venta tøft då topp-tippa Åndalsnes var gjestar i seriepremieren fredag.
Kaptein Tommy Kanishi Andreassen gjekk føre og takla så det lukta svidd i starten, men ellers vart det litt for forsiktig frå heimelaget. Laget gav vekk ballen for lett og greide aldri å skape noko framover.
Lenge sto det likevel 0-0, men på ein corner glapp markeringa og Eskil Bersås fekk heade inn 0-1. 0-2 kom på eit skot frå Ronald Dutra Paiva som gjekk via ein uheldig Svein Erik Lange Male og i mål. Rett før pause spratt ballen i tverrliggaren etter ein duell i Varfjell-forsvaret. 0-2 ved halv tid.
ÅIF varta opp med eit fint angrep rett etter pause og Paiva avslutta med eit skot i krysset. Sjølv om gjestane hadde ballen og styrte det meste, skapte dei ikkje så mange sjansar utanom skåringane.
Heimelaget hadde eit par gode angrepsforsøk tidleg i andre omgang, men kom ikkje nærare enn eit skot utanfor etter eit raid frå William Hjelvik.
Dessverre mangla ein skadd Kristian Flittie Onstad i midtforsvaret for heimelaget. Her gjorde likevel Simon Kjørvik og Svein Erik Lange Male ein god jobb.
Trenar Odd Hjelvik seier til Bygdebladet etter kampen at dei prøvde å ligge lågt frå start og dra ned tempo.
- ÅIF var effektive, og skårar på to av tre sjansar før pause, sa Hjelvik etter kampen.
Han legg til at dei prøvde med eit litt høgare press etter pause, utan at vi lykkast heilt med det.
- Men ut frå treningsgrunnlaget og mannskapet vi har, er eg ikkje misfornøgd med prestasjonane. Her er absolutt ting å ta med seg vidare, sa Hjelvik.
Tre spelarar debuterte i obligatorisk a-lagskamp for Vestnes Varfjell: Fredrik Lie og Rudi Talberg Samseth frå samarbeidslaget Måndalen samt veteranen Ole Alexander Ulvestad.
Rundt 180 tilskuarar, inkludert mange frå stasjonsbyen og også nokre med skjerf med støtte til begge lag.
Neste kamp er mot Malmefjorden andre påskedag, også den på Vestnes etter at laga har vorte samde om å snu oppgjeret då bana i søre Fræna ikkje er speleklar.
KAMPFAKTA
Vestnes Varfjell - Åndalsnes 0-3 (0-2)
4. divisjon Nordmøre og Romsdal, fredag 11. april 2025 kl 19
Vestnes Idrettspark, 180 tilskuarar
Mål:
0-1 (17) Eskil Bersås
0-2 (33) Ronald Dutra Paiva
0-3 (46) Ronald Dutra Paiva
Dommar: Eirik Hyldbakk Furu, FCK. Assistentdommarar: Eirik Stenberg, Elnesvågen og Håkon Skram, Frei
Gult kort: Leo Krogseth, Vestnes Varfjell (75)
Vestnes Varfjell (4-5-1)
12 Egil Dalhaug
9 Magnus Nerheim
22 Simon Ødegård Kjørvik
23 Svein Erik Lange Male
25 Sverre Olgar Lindset
8 Vegar Bjørkevoll Skare
10 Leo Villa Krogseth
17 Fredrik Lie Debutant
20 William Pedersen Hjelvik
80 Tommy Kanishi Andreassen (kaptein)
7 Elling Furland Olafsen
Innbyttarar:
12 Lars Håvard Heen Lien (ikkje benytta)
2 Håkon Ødegård Kjørvik 78. min for Nerheim
3 Ole Alexander Mekvik Ulvestad 70. min for Lie (debut)
6 Ørjan Tangen 63. min for Kanishi
14 Knut Stian Eik 46. min for Olafsen
27 Magnus Skorgen Søraas 60. min for Hjelvik
95 Rudi Talberg Samseth 38. min for Skare (debut)
Tor-Bjarne Løvik Salte spelte heile kampen for Åndalsnes.
Bildegalleri under:
