(Vestnes Varfjell - Dahle 2-0) Headingar frå Svein Erik Lange Male og Jon Areas Venås, begge etter corner, sørga for årets første seier for Vestnes Varfjell. Poenga vart sikra i ein skikkeleg arbeidsseier.
Endeleg fekk laget igjen for innsatsen som har gitt knepne tap i dei to siste kampane. Det såg ikkje så lyst ut i starten mot Dahle fredag heller. Gjestane hadde eit overtak før pause, men det vart berre nesten for gjestane frå Kristiansund.
Vestnes Varfjell sleit med å etablere noko angrepsspel, det næraste dei kom skåring var eit frispark frå Tommy Kanishi Andreassen som strauk på utsida av stolpen etter 12 minutt. Ti minutt seinare hadde Elling Olafsen ein sjanse, men skotet gjekk over. Varfjell-målvakt sørga for at omgangen vart mållaus då han varta opp med ei god redning på bakre stolpe rett før halv tid.
Trenarduoen Odd Hjelvik og Bjørn Nedreskodje la om formasjon til andre omgang. Simon Kjørvik vart flytta fram for å gje meir løpsstyrke på midtbanen og heilt framme skulle Jon Areas Venås jage.
Tommy Kanishi Andreassen kom til den første sjansen etter pause då han forfølgde ein ball, men keeper rakk ut i tide. Like etter serverte Svein Erik Lange Male Leo Krogseth lurt på eit frispark, men avslutninga gjekk over. Så var det Simon Kjørvik sin tur til å prøve seg, men skotet gjekk like utanfor via keeper til corner. Då var det spelt timen. Svein Erik Lange Male blir alltid flytta fram på hjørnespark. Han raga igjen høgast i feltet og heada inn 1-0.
Dette var kvelden for cornermål for heimelaget. For der gjestane ikkje skåra på nokon av sine tosifra antall hjørnespark, var heimelaget dødleg effektive på sine - servert av Leo Krogseth. 75 minutt var spelt då Jon Areas Venås plasserte seg på rett stad og heada over Dahles spelande trenar og målvakt Bjørnar Jünge Husby til 2-0. Det var Venås sitt første seriemål etter overgangen frå Måndalen.
Enno var det mange minutt att og Dahle la inn eit press på slutten. Det trufaste heimepublikummet som hadde møtt fram i det sure vårvêret fekk sjå eit heimelag som kjempa som løver om kvar ball. Dahle prøvde å sette inn ein sluttspurt, men Vestnes Varfjell spelte med hjartet utanpå drakta innstilt på å ta årets første seier. Dommar la til mykje, mellom anna fordi ein Dahle-spelar landa forkjært og skada armen, men til slutt kunne laget juble for seier.
Det blir feil å trekke fram enkeltspelarar etter denne kampen som altså var ein skikkeleg arbeidsseier, men me kjem ikkje utanom kaptein Tommy Kanishi Andreassen som spelte med smerter og ofra seg kampen. Målvakt Egil Dalhaug heldt laget inne i kampen før pause, i andre omgang var Simon Kjørvik drivande då han vart flytta opp på midtbanen og Jon Areas Venås var eit konstant uromoment. Og ikkje minst: Svein Erik Lange Male - matchvinnar i begge endar av bana!
Ekstra sterk var seieren fordi laget også er skadesvekka for tida. Både Kristian Flittie Onstad og William Hjelvik var mellom dei som måtte stå over denne gongen, men stallen er brei og mange står klare til å fylle tomromma. Lucas Vold Moen frå Måndalen debuterte då han kom inn som innbyttar i andre omgang. Også Andreas Hole fekk sine første minutt i obligatorisk A-lagskamp. Odd Johann Ludviksen har spelt nokre minutt allereie. Spelaren med fortid i mellom anna Ellingsøy og AK kom inn tidleg for ein skadd Knut Stian Eik.
Neste kamp er borte mot Eide.
Bildegalleri under:
KAMPFAKTA:
Vestnes Varfjell - Dahle 2-0 ( 0- 0)
4. divisjon Nordmøre og Romsdal, fredag 2. mai 2025 kl 19
Vestnes idrettspark, 95 tilskuarar
Mål:
1-0 (61) Svein Erik Lange Male
2-0 (75) Jon Areas Venås
Dommar: Sjur Engelsen Lange, Guard. Assistentdommarar: Tobias Lekvam, Rosenborg og Arve Toven, Norborg
Gult kort: To til Dahle
Vestnes Varfjell (4-4-2):
