(Vestnes Varfjell - Åndalsnes 1-3) Knut Stian Eik gav Vestnes Varfjell leiinga då Åndalsnes gjesta Vestnes idrettspark fredag kveld. Heielaget heldt unna lenge, men til slutt kunne serieleiaren reise heim med alle poenga.
Seiersvante raumaværingar kom til Vestnes for å møte eit heimelag som skulle "reise kjerringa" etter det forsmedelege stortapet mot Tomrefjord sist. Det var då også gjestane som opna med eit stort press og berre ein god Egil Dalhaug hindra baklengs i startminutta.
I staden tok heimelaget frekt leiinga etter åtte minutt. Noah Johansen gjorde forarbeidet før Amund Stavem skaut i stolpen. Ballen traff ryggen på ein uheldig keeper og Knut Stian Eik sørga for å få ballen over streken til 1-0.
Resten av omgangen vart ein forsvarskamp, utan at Åndalsnes skapte all verda før heilt mot slutten. Då måtte igjen Dalhaug avverge to gode sjansar før ballen small i tverrliggaren på overtid. 1-0 ved halv tid og heimelaget kunne gå til pause med applaus frå publikum.
Andre omgang starta med at gjestane igjen trefte metallet, denne gongen heilt i krysset. Så jamna det seg meir ut og Leo Krogseth hadde sjansen til å auke til 2-0, men skotet gjekk utanfor. Noah Johansen hadde også sjansen, men lobben frå skrått hald gjekk like over då timen var spelt.
Like etter fekk omsider ÅIF uttelling då Ronald Dutra Paiva var sist på eit hardt innlegg som gjekk gjennnom Varfjell-forsvaret.
Varfjell pressa litt på etter dette og Amund Staven var nære å ta tilbake leiinga, men skaut over. Tommy Kanishi kom også igjennom, men kom for skrått på mol og skotet gjekk utanfor kvareret før slutt.
Kanishi måtte etter kvart ut, og det røyna på for heimelaget. ÅIF viste no at dei har trent betre, og tok over mot slutten. Etter 79 minutt kom dei litt for lett igjennom etter eit balltap på midtbana, og Ronald Dutra Paiva vart i tomålsskårar då han la på til 2-1 etter eit mål likt hans første. David Aleksander Ytterli Olsvik fastsette resultatet til 3-1 like etterpå med eit skot på første stolpe.
Sjølv om det vart tap, var det mykje bra å ta med seg etter denne kampen. Det var i alle fall ein heilt anna innsats enn på 16. mai.
Elnesvågen borte er neste kamp.
KAMPFAKTA
Vestnes Varfjell - Åndalsnes 1-2 (1-0)
4. divisjon Nordmøre og Romsdal, fredag 24. mai 2024 kl 19
Vestnes idrettspark, 170 tilskuarar
