Forsvarskamp då Dahle vart for sterke (bildegalleri)

(Vestnes Varfjell - Dahle 0-1) Det vart ein forsvarskamp mot topplaget Dahle i Vestnes idrettspark fredag. Det var likevel spenning til det siste så lenge det berre sto 0-1, men Dahle vann til slutt fortent. Kampens einaste mål kom rett før pause.

Bildegalleri under:

Gjestane frå Kristiansund tok kommandoen frå start mot eit heimelag som jakta sin tredje strake seier. Før ti minutt var spelt Dahle eit langskot i tverrliggaren og ei feberredning frå Owen Connor unna leiing. Etterpå roa det seg og heimelaget spelte seg gradvis inn i kampen.

Vestnes Varfjell vart tvunge til å gjere tidlege bytter på Simon Kjørvik og Oliver Connor Søreng grunna skade, og frå før sat toppskårar Elling Olafsen i sivil etter at han fekk sitt fjerde gule kort mot Malmefjorden sist.

Framover sat det heller ikkje heilt, sjølv om laget kom til nokre nesten-sjansar og to store. Dei store kom då Adrian Kosinski kom fri rundt halvtimen ut i kampen. Først skaut han like utanfor, andre gong fann han Magnus Nerheim som heller ikkje lukkast å få ballen mellom stengene.

Heimelaget såg ut til å ha rodd inn 0-0 til pause då Dahle vann ballen på midtbana og la inn der John Karlsen kunne avslutte med eit skot ute ved stolpen. 0-1 ved halv tid.

Kampbildet var det same i andre omgang, men ein god Owen Connor og upresise avslutningar frå gjestane gjorde at spenninga levde.

Magnus Nerheim vart spelt fri etter ti minutt, men skotet strauk stolpen. Etter timen hadde Amund Stavem eit godt skot, men igjen utanfor.

Vestnes Varfjell forsvarte seg godt og håpet om at det kunne bli eit heldig poeng steig. Laget fekk sjansen på eit frispark like utanfor 16-meteren, men forsøket frå Adrian Kosinski gjekk over. Det gjorde også skotet frå Amund Stavem på overtid.

Dermed ebba kampen ut med seier 1-0 til Dahle. Midsund borte er neste kamp.

Keeper Connor og midststoppar Tor-Bjarne Løvik Salte var lagets beste i kveld.

KAMPFAKTA:

Vestnes Varfjell - Dahle 0-1 (0-1)

Seriekamp 4. divisjon Nordmøre og Romsdal

Fredag 25. august 2023 kl 19

Vestnes idrettspark, 75 tilskuarar

Mål:

0-1 (44) John Karlsen

Dommar: Ole Magne Nordvik, Søya

Assistentdommarar: Jonny Dyb, Giske og Oliwier Grezegorz Deuter, Elnesvågen

Gult kort: Eirik Tomren, Vestnes Varfjell og Berek Goiyton Kfiay, Dahle

Vestnes Varfjell (4-3-3): Owen Connor: Simon Kjørvik (Magnus Nerheim 12. (Ørjan Tangen 76.)), Tor-Bjarne Løvik Salte, Svein Erik Lange Male, Lars-Helge Lien (Lucas Våge 70.) - Amund Stavem (k), Vegar Skare, Oliver Connor Søreng (Airilas Skirgaila 20. (Jarle Løvik Salte 76.)) - Leo Krogseth, Adrian Kosinski, Eirik Leao Tomren

Bildegalleri (klikk på eit bilde for å starte lysbilde-visning)