A-laget: Godt oppmøte og gode treningsforhold

Vestnes Varfjell-trenar Alexander Connor jr er godt fornøgd med sesongførebuingane for A-laget så langt i vinter. Fram til denne veka har laget trent på bart kunstgras i idrettsparken. Oppmøtet har vore godt. - Vi har ein veldig ung og lovande stall. Det blir morsomt å sleppe dei laus i 3. divisjon og sjå kva dei greier å utrette der, seier Connor til varfjell.no.
Connor fortel at treningane har gått etter plana til no.

- Treningsforholda har vore bra og treningane har stort sett gått som planlagt.  Det har vore eit relativ godt oppmøte, med 15-20 spelarar på kvar trening, seier han.

Den første testen på korleis laget ligg an får han onsdag 7. februar. Då er det avtalt treningskamp borte mot Brattvåg, eit lag som rykka opp til 3. divisjon på Sunnmøre sist haust og som satsar friskt med fleire nye spelarar.

- Det kan hende vi får til ein treningskamp før dette også, men det er enno ikkje avklart, seier Connor.

Stranda kjem til Vestnes idrettspark tirsdag 13. februar. Totalt er det til no avtalt sju treningskampar, alle mot lag fra Sunnmøre.