Vestnes Varfjell tapte 1-10 i ein treningskamp mot sama motstandar i vinter og var vel ikkje levna store sjansar på Elnesvågen stadion laurdag. Likevel var det gjestane som opna best, likevel utan å skape sjansar i motvinden.
Nirut Mjøs måtte ut med skade alt etter drygt ti minutt og det måtte gjerast endringar i eit forsvar som frå før mangla Ørjan Tangen. Medan Vestnes Varfjell enno var ti mann skåra heimelaget sitt første mål ved Kjetil Brudeset som snappa opp ein retur. Kristian Benjaminsen la på til 2-0 like etterpå og det såg ut til at heimelaget skulle gå mot ein klar seier.
Men Vestnes Varfjell kjempa godt og heldt nullen resten av omgangen mot eit heimelag som brente fleire klare sjansar. Vestnes Varfjell kom til eit par halvsjansar.
I andre omgang fekk Vestnes Varfjell betre formasjon over spelet sitt og reduseringa kom etter eit kvarter då Oddgeir Vikås vart spelt fri og sette inn 1-2. Seks minutt seinare var det Ronny Leikarnes sin tur til å bli spelt igjennom og den gamle storskåraren utlikna til 2-2.
Vestnes Varfjell ryste heimelaget i denne perioden og Yngve Solevågseide var nære skåring på eit frispark som keeper slo i tverrliggaren og over. På den påfølgande corneren heada Thomas André Brastad like over.
Heimelaget var farlege når dei kom med sitt raske og presise overgangsspel. Dei starta andre omgang med å brenne ein klar sjanse og sleit lenge med å få uttelling. Ti minutt før slutt lukkast det likevel for Kjetil Brudseth som sikra seieren med eit godt skot.
Elnesvågen hadde klart flest sjansar i kampen, men Vestnes Varfjell skal ha ros for stor innsats som nær hadde gitt eitt poeng. Alle jobba godt, men aller best synest me Karl Arne Stokkeland var. Keeper Arild Mundal hadde også fleire gode redningar. Alexander Bjørenevik debuterte og gjorde ein fin innsats, først som ving, seinare som back.
Kampfakta:
Elnesvågen og Omegn - Vestnes Varfjell 3-2
Pause: 2-0
3. divisjon Nordmøre/Romsdal
Elnesvågen stadion
Laurdag 6. juni 2009 kl 15.30
mål:
1-0 (14) Kjetil Brudeset
2-0 (16) Kristian Benjaminsen
2-1 (60) Oddgeir Vikås
2-2 (66) Ronny Leikarnes
3-2 (79) Brudeset
Tilskuarar: 65
Dommar: Ole Bjørn Moen, Eide.
Gult kort: Alexander Bjørnevik og Thomas André Brastad, Vestnes Varfjell, ett til Elnesvågen.
Vestnes Varfjell (4-5-1): Arild Mundal, Simen Brennvik, Yngve Solevågseide, Nirut Mjøs (Oddgeir Vikås 15.), Thomas André Brastad - Elling Olafsen (Svein Erik Lange Male 88.), Karl Arne Stokkeland, Alexander Connor, Vegard Ellingseter, Alexander Bjørnevik - Ronny Leikarnes.
