Vestnes Varfjell starta haustsesongen med å slå AK 4-2. Elling Olafsen 3 og Magnus Nerheim på straffe var målskårarar. Ein god arbeidsseier der det endeleg bikka rett veg.
Video i VarfjellTV | AK om kampen | Tidens Krav om kampen
11 minutt var spelt då Elling Olafsen utnytta ei svak avklaring frå AK og sendte ballen i boge over keeper og i mål. Karl Arne Stokkeland skaut utanfor frå kloss hald medan Markus Brudseth trefte tverrliggaren i ein førsteomgang der spelet bølga fram og tilbake. AK brukte berrre 24 sekund av andre omgang til å komme ajour. Ei feilpasning vart snappa opp og toppskårar Christoffer Folland vart spelt igjennom før han plasserte ballen mellom keeper og stolpen. Fem minutt etter var heimelaget på nytt i leiinga. Tommy Kanishi sette opp Olafsen som tok eit steg til sida før han plasserte skotet forbi keeper og inn via stolperota. AK hadde ein stor sjanse der eit skot vart blåst over frå bakre stolpe, før Olafsen fullførte sitt hattrick til leiing 3-1. Spissen forfølgde eit langt utspark frå keeper Fredrik Bergslid, heada ballen ned til sjølv før han vann duellen med AK-stopparen og sette ballen mellom beina på keeper og i mål. Klasse! Dessverre slo AK raskt tilbake. Ein ball vart heada uheldig bakover frå ein Varfjell-forsvarar. Der dukka Folland opp og lurte ballen forbi keeper frå nesten død vinkel. Dermed ny spenning dei siste ti minutta. Gjestane frå Nordmøre pressa på, men greide ikkje så skape dei heilt store sjansane. I motsatt ende var Varfjell farleg på kontringar. På overtid spelte Kanishi innbyttar Justin Sætre igjennom. Han vart felt av AK-målvakta. Dermed straffespark som Magnus Nerheim sette inn til sluttresultatet 4-2.
Olafsen sjølvsagt "man of the match" med tre utsøkte skåringar, men dette var først og fremst ein skikkeleg lagseier. Tre poeng var kjærkomne no etter ein litt mager periode på slutten av vårsesongen. Ole-Gunnar Kjærstad var tilbake og viste seg som eit bra tilskot på dei minutta han fekk.
Neste kamp er også på heimebane, den fjerde på rad sidan kampen mot AK var "snudd". Topplaget KBK 2 gjestar Vestnes idrettspark fredag klokka 19.
Kampfakta:
Vestnes Varfjell - Averøykameratene 4-2 (1-0)
Seriekamp 4. divisjon Nordmøre/Romsdal
Laurdag 12. august 2017 kl 14.30
Vestnes idrettspark, 40 tilskuarar
Mål:
1-0 (12) Elling Olafsen
1-1 (46) Christoffer Folland
2-1 (50) Olafsen
3-1 (81) Olafsen
3-2 (83) Folland
4-2 (90+2) Magnus Nerheim, straffespark
Dommar: Martin Sørensen Kristiansen, Nordlandet
Gult kort: Amund Stavem, to til AK
Vestnes Varfjell (4-3-3): Fredrik Bergslid; Håkon Kjørvik, Sivert Nerheim, Liam Connor, Magnus Nerheim - Vegar Skare, Karl Arne Stokkeland (Ole-Gunnar Kjærstad 62.), Markus Brudseth (Jarle Løvik Salte 82.) - Amund Stavem (Adrian Liabø 90.), Elling Olafsen (Justin Sætre 82.), Tommy Kanishi Andreassen
