Kongens sølv til Tjelle

Torstein Tjelle er tildelt Kongens fortenstmedalje i sølv. Tjelle har vore lege i Vestnes gjennom ein mannsalder, men har også vore både leiar og trenar i Varfjell. For dette vart han i 1987 utnemnt som æresmedlem i klubben. Innsatsen for idretten var med i grunngjevinga for medaljetildelinga. Under medaljefesten fekk dei 50 gjestane også eit innblikk i korleis det var å kombinere arbeidet som travel kommunelege med det å vere trenar for A-laget til Varfjell. 

Tjelle forklarte, ifølgje referata, at bortekampane vart lagt til veker utanom vakt. På heimekampane hadde han avtale om med rektor Asbjørn Gjeitnes om å låne telefonen på Tresfjord skule for å ringe heim til kona Grethe for å høyre om det var pasientar som trong snarleg hjelp.

- Det hende nok at Grethe og Per Tomren (ambulansesjåfør) stod for ein del sjukehusinnleggingar i denne tida, sa Tjelle.

Odd Jarle Talberg overrakte ein blomsteroppsats med klubbvimpel frå Vestnes Varfjell IL. Klubbleiar Kai Magne Stokkeland var forhindra for å vere med på gutelagskamp i Molde. Dette meinte Talberg måtte vere i Tjelle si ånd, noko prisvinnaren var samd i.

Utdelinga skjedde sist måndag, og det var ordførar Knut Flølo som sto for overrekking av medalje og diplom frå kong Harald.